ትርጉም ምስላ – Habeshaa Entertainment

ሓዳግ ልቢ ጾር ይድርቢ

Habeshaa Ent. — Thu, 16 Jul 2020 08:08:11 +0000

ኣብ ዝምድናታት ተመርኹሶም ዝተኻየዱ መጽናዕቲ ከም ዝሕብርዎ፡ ሕድገት ካብ ሕርቃን፡ ቂምን ቅርሕንትን ዝወርድ ስቅያት ፈውሲ’ዩ። እቲ ስቅያት ኣካላዊ ጉድኣት’ዉን የስዕብ። ጸቕጢ ደምን ሆርሞናዊ ምምዝባልን ኣስዒቡ ናይ ልብን መትንታትን ዕማማት ከሰናኽል ይኽእል። ሓዳግ ልቢ ምስ ዝህልወካ ካብ ጠንቅታት’ዚ ሕማም ናይ ምድሓን ዕድል ብሚእቲ ሚእታዊት ይዓቢ። ሕድገት፡ ጾር ይድርቢ -ጾር ናይ ቂመኛታት። ምኒን ዘዘውትር፡ ደድሕሪ ቂም ዝጉዓዝ ሰብ ብማሕበራዊ ተነጽሎ ይሳቐ። ሓዳግ ልቢ ዘላቶ ሰብ ግን ብዙሓት ፈተውቲ፡ መናብርትን ቤተ ሰብን የጥሪ። ምሕረት ዘዘውትር ሰብ ኣብ ዉሱን ኣጋጣሚታት ዝፍጽሞ ዘይኾነ ሰብኣዊ ባህርያትን ልምድታትን ጌሩ ይወስዶ። ሕርቃን ኣካል ባህርያት ወዲ ሰብ’ዩ። ሓሪቕካ ምንባር ግን ጎዳኢ እዩ። ምሕረት ምግባር ክብሃል ከሎ፡ ንበደለኛ ጽቡቕ ገይርካ ምባል ወይ ድማ ምስ በደሉ ምትዕራቕ ማለት ኣይኮነን። የግዳስ ነቲ ሕርቃንን ቂምን ካብ ነብስኻ ኣውጺእካ ምርሳዑ እዩ። ሕኒን እናበልካ፡ ብእህህታን ፈኸራን፡ ወገናዊ ሕነ ምፍዳይን እናሓለንካ ካብ ምንባር ሓራ ናይ ምዃን ዘይበርስ ልምዲ ምጥራይ ማለት እዩ። ጥንታዊ ሃይማኖታዊ መራሒ ቻይና(ኮንፈዮሽስ) “ መዋእሉ ሕነ ኣብ ምፍዳይ ዝዕጠቕ፡ ክልተ ጉድጓድ (መቓብር) ክፍሕር ኣለዎ።” ኢሉ ይብሃል። ካብ ቅርሕንቲ እትእለየሉ ምኽንያት፡ ካብ ፍርሒ ዝነቐለ ክኸውን ዘይግባእ’ኳ እንተኾነ፡ ለኻኺምካ ናይ ምጥፋእ ሕልና’ወን ዝጠቕም ኣይኮነን። መበገሲኻ፡ ሃይማኖት፡ ልቢ ምዕባይ ወይ ድማ ንቕሓት ክኸውን ይኽእል። ሓዳግ ልቢ ድማ ጾርይ ይድርቢ።

ትርጉም ምስላ “ዘይስንኻ ሑጻ ቈርጥመሉ”

Habeshaa Ent. — Wed, 15 Jul 2020 08:40:36 +0000

እዚ ምስላ’ዚ ንዝዀነ ናትካ ዘይኰነ ነገራት ልክዕ ከም ናትካ ርኢኻ ብግቡእ ክትጥቀመሉ ከምዘለካ የዘኻኽረካ። ንኣብነት ብሽክለታ ካብ ሰብ ለሚንካ ክትጥቀመላ ከለኻ፡ እታ ብሽክለታ ናተይ ኣይኰነትን ኢልካ ከይተጠንቀቕካ ብጐዳጉዲ እንተዘዊርካያ እዛ ምስላ ትምሰለልካ ማለት’ዩ። ስንና ከቐንዝወና ወይ ክስበር ስለዘይንደሊ ብስንና ሑጻ ክንቁርጥም ኣይንደልን ኢና። ናይ ካልእ ሰብ ስኒ እንተዝኸውን ግን ሑጻ ምቖርጠምናሉዶ? ብዛዕባ ነብስና ጥራይ ንሓስብ እንተዀይንና ምቖርጠምናሉ። ብዛዕባ ካልኦት ንሓስብ እነተዀይንና ግን ኣይምቖርጠምናሉን።

ኣብ ሓደ ዓዲ’ዩ። ሓንቲ ሰበይቲ ኣድጋ ስለዝሞተ ኣድጊ ካብ ጐረቤት ለሚና ማይካብ ሩባ ከተምጽእ ከደት። እታ ሰበይቲ ኣድጋ ከይሞተ ከሎ ክልተ ጀሪካን ጥራይ’ያ
ትጽዕኖ ዝነበረት። ነቲ ካብ ጐረቤታ ዝለመነቶ ኣድጊ ግና ኣርባዕተ ጀሪካን ጸዓነቶ። እቲ ኣድጊ ካብ መጠን ንላዕሊ ከቢድዎ ነበረ። እታ ጐረቤታ ነዚ ምስ ርኣየት “ዘይስንኻ ሑጻ ቆርጥመሉ።” በለታ። ኣድግኺ ስለዘይኰነ ኣርባዕተ ጀሪካን ጽዒንክዮ ማለታ’ዩ።

ትርጉም ምስላ “ሸውዓተ ዓመት ከይመሃሩ 70 ዓመት ይድንቊሩ”

Habeshaa Ent. — Tue, 14 Jul 2020 11:44:40 +0000

እዚ ምስላ ሰብ ክመሃርን ንኽፈልጥ ክጽዕርን ከምዘለዎ’ዩ ዘዘኻኽረና። ትርጉሙ ድማ፡ ሰባት ንዝተወሰነ ግዜ ብዓቕሊ ተማሂሮም ነባሪ ፍልጠት ከይቀስሙ፡ ንምሉእ ዕድሚኦም መሃይም ኰይኖም ይንብሩ ማለት’ዩ። ብኻልእ ወገን ክርአ ከሎ ድማ ኣብ እዋኑ ዘይፈታሕካዮ ሽግር ንመዋእል ከሳቕየካ ይነብር ክትርጎም ይከኣል።