መገሻ – Habeshaa Entertainment

ሂልተን ቦራ-ቦራ

Habeshaa Ent. — Tue, 14 Jul 2020 07:33:09 +0000

እዚ ኣብ ትሕቲ ደቡባዊ ሰላማዊ ውቅያኖስ ዝርከብ መዘናግዒ ቦታ’ዚ ብሓፈሻ 86 ኣብ ልዕሊ ማይ ዝተሰርሑ ቪላታት፡ 16 ካብ ባሕሪ ዝተፈልዩ ጨዋም መሐንበሲ ቀላያት፡ 20 ብዕምባባ ዘጌጹ ኣብ ሕቑፊ ጎቦ ዝተሃንጹ ቪላታት፡ 2 ኣብያተ መግብን ዘጠቓለለ ሰፊሕ መዘናግዒ’ዩ። ሂልተን ቦራቦራ ናይ ገዛእ ርእሱ ፍሉይ ኣቀማምጣ’ዩ ዘለዎ። ብድሕሪ’ቲ ሞቱ ቱፑዋ ዝተባህለ እሳተጎመራዊ ጎቦታት ስለዝርከብ እቲ ኣብ ወሰናስኑ ዝርከብ ጻዕዳ ሑጻ ብጸለምቲ ኣእማን ሩባን ልሙዕ ትሮፒካዊ ኣግራብን ተኸቢቡ ዘሎ ሂልተን ቦራቦራ ሹግሹግ መሳጢ ትርኢት’ዩ ዝፈጥር። እቲ ቀንዲ ህንጻታት ሂልተን ቦራቦራ ብልዕሊ’ቲ ሰማያዊ ሕብሪ ዘለዎ መሐንበሲ ናብቲ ሰፊሕ ውቅያኖስ ከም ዝጥምት ኮይኑ’ዩ ተሃኒጹ። እቶም ኣብ ልዕሊ ማይ ዝተሃንጹ ብዓል ሓደ ደርቢ ህንጻታቱ ድማ ብኽቡር ሉሕን ናይ ጠርሙስ ምድሪ ቤትን ዘጌጹ እዮም። እቲ ብዓል ክልተ ደርቢ ህንጻ ናይ መዘናግዒ ቦታ፡ ናብቲ ገማግም ባሕርን ቀንዲ ቤት መግብን ዝቐረበ’ዩ። ብሓፈሻ እቲ ኣብ ልዕሊ ማይ ዝተደኮነ ቪላታት ኣብ ልዕሊ ፍዮሪ ባሕሪ ዝተነጽፈ’ዩ ዝመስል።

ሂልተን ቦራ-ቦራ ቪድዮ

ጎደና ዘይብላ ዓዲ

Habeshaa Ent. — Tue, 14 Jul 2020 07:26:25 +0000

ጌቱርን ኣብ ኔዘርላንድ እትርከብ ንእሽቶ ከተማ’ያ። እዛ ከተማ ጽርግያ ዝበሃል የብላን። ብማይ ዝተኸበበት ስለዝኾነት። ስለ’ዚ ድማ ነበርታ ካብ ሓደ ቦታ ናብ ካልእ ቦታ (ኣብ ውሽጢ’ታ ዓዲ) ክንቀሳቐሱ ጎደና ዘይብላ ዓዲ እንተኾይኖም ብጃልባ’ዮም ዝጥቀሙ። ነፍሲ-ወከፍ ስድራ ናይ’ታ ዓዲ ኣብ ናይ ውልቃ ደሴት’ያ ትነብር እንተተባህለ’ውን ዝተጋነነ ኣይኮነን። ጽቡቕ ጌርኩም ከተስተማቕርዋ ነዚ ዝስዕብ ቪድዮ ተኸተሉ !

ዝዓበያ ወደባት ዓለም

Habeshaa Ent. — Mon, 13 Jul 2020 14:55:51 +0000

ኣህጉር ኤስያ እታ ብዓይነትን ብዝሕን ዝበለጻ ወደባት እትውንን ክፍለ ዓለም’ያ። ብፍላይ ሃገረ ቻይና ሸውዓተ ካብተን ዝዓበየ ወደባት ዓለም ኣብ ሕቑፎኣ ሒዛ ትርከብ። ዓለማዊ ሳታስቲክስ ወደባት ብዝሃቦ ደረጃ እታ ዝዓበየ ወደብ ዝብል ክብሪ ሒዙ ዝርክብ ወደብ ሻንጋይ’ያ። ወደብ ሻንጋይ ነዚ ክብሪ’ዚ ንምብቓዕ ካብ ዘኽኣሎ ቀንዲ ረቛሒ ሓያለ ናይ ስራሕ ዕድላት ዝፈጥር ትካል ብምዃኑ’ዩ። ወደብ ሻንጋይ ኣብ ቻይና ካብ ዝርከቡ ዝለዓሉ ናይ ስራሕ ዕድላት ዝፈጥሩ ሓሙሽተ ትካላት ሓደ’ዩ። ወደብ ሻንጋይ ብማእከላይ ገምጋም ኣብ ዓመት ክሳብ 25 ሚልዮን መራኽብ ተቐቢሉ ኣገልግሎት ይህብ። ንሻንጋይ ተኸቲሉ ኣብ ካልኣይ ደረጃ ዝስራዕ ወደብ ብተመሳሳሊ ኣብ ቻይና ዝርከብ ወደብ ኒግቦ ዞዎሻን’ዩ። ወደብ ዞዎሻን ብስፍሓቱ ምስ ሻንጋይ ዝወዳደር’ኳ እንተኾነ ዝህቦ ኣገልግሎት ግን ብመጠኑ ዝተሓተ’ዩ። ንብዙሕ ዓመታት ዝዓበየ ወደብ ዝብል ክብሪ ዝሓዘን ኣብ ሳልሳይ ደረጃ ክስራዕ ዝተገደደን ወደብ ድማ ሲንጋፖር’ዩ። ኣዝዩ ልዑል ተጠላብነትን ስምን ዘለዎ ወደብ ሲንጋፖር ዝህቦ ኣግልግሎት ብዙሕ ይኹን’ምበር ንዕብየት እዘን ቻይናውያን ወደባት ክወዳደር ግን ኣይከኣለን ዘሎ። ኣብ ዝርዝር ዓሰርተ ዓበይቲ ወደባት ዓለም እቲ እንኮ ንኣህጉር ኤውሮጳ ዝወከለ ወደብ ኣብ ከተማ ሮተርዳም-ሆላንድ ዝርከብ ወደብ’ዩ። ክሳብ 2006 ዝዓበየ ወደብ ዝነበረ ወደብ ሮተርዳም ካብ ኤውሮጳ እቲ ዝዓበየ ወደብ’ዩ።

ነዞም ኣብ ላዕሊ ዝተገልጹ ኣርባዕተ ወደባት ተኸቲሎም ኣብ ዝርዝር ቀዳሞት 10 ዝተረቑሑ ዓበይቲ ወደባት እዞም ዝስዕቡ ኢዮም ።

– ሓምሻይ ደረጃ ፡ኣብ ሰሜናዊ ክፋል ቻይና ዝርከብ ወደብ ትያንጅን ።

– ሻድሻይ፡ ወደብ ጎንዙዋ እዚ ውን ብተመሳሳሊ ኣብ ቻይና ይርከብ።

– ኣብ ቻይና ዝርከቡ ወደባት ኪንጋንዶ ፡ ኪንሁዋንግን ሆንግኮንግ ክሳብ ታሽዓይ ደረጃታት ዝሓዙ ክኾኑ ከለዉ ኣብ ከተማ ቡሳን ደቡብ ኮርያ ዝርከብ ወደብ ቡሳን ድማ ዓስራይ ደረጃ ይሕዝ።

ን ሓደ ዓመት ብነጻ ዝተመገበ ቻይናዊ

Habeshaa Ent. — Mon, 13 Jul 2020 11:49:45 +0000

ሓደ ቻይናዊ፡ ሓንቲ ናይ ቀዳማይ ደርቢ (first class) ናይ ጉዕዞ ትኬት ብምግዛእ፡ ንሓደ ዓመት ዝኣክል ኣብ ቤት መግቢ ናይ መዓርፎ ነፈርቲ ኣታሊሉ ድሕሪ ምምጋቡ፡ ዝሓለፈ ሰሙን ከምእተታሕዘ፡ ፎክስኒውስ ዝተባህለ መርበብ ሓበሬታ ኣፍሊጡ። እቲ ዛንታ ከምዚ እዩ። ወዮ ቻይናዊ ካብ መንገዲ ኣየር ምብራቓዊ ቻይና ናይ ቀዳማይ ደርቢ ናይ ጉዕዙ ትኬት ይገዝእ። ኣብቲ መዓርፎ ነፈርቲ ትኬቱ ንስታፍ ላውንጅ ብምርኣይ ከም ዝኾነ ካልእ ናይ ቀዳማይ ደርቢ ተጓዓዛይ መግቡ ይበልዕ። ብድሕሪ’ዚ ኣብ ክንዲ ናብ ነፋሪት ዝስቀል፡ ኣብቲ ትኬቱ ዘሎ ናይ ንቕሎ ዕለት፡ ናብ ካልእ እዋን የቐይሮ። ኣቐዪርዎ ምስ መጸ ከኣ ይምገብ። ከምዚ እናበለ ምስሑ በበሊዑ መዓልቲ ንቕሎኡ ብሓንቲ ናይ ኣየር ትኬት፡ ዓመት ዝተመገበ ቻይናዊ ተታሒዙ እናቐየረ ዓመት ተዓንጊሉ። መዓልቲ ጉዕዞኡ ከኣ ኣብ ውሽጢ’ቲ ሓደ ዓመት 300 ግዜ ተቐያይሩ። መንገዲ ኣየር ምብራቓዊ ቻይና ነቲ ጉዳይ ክምርምሮ ጀሚሩ። እቲ ሰብ ክፍለጥን ክተሓዝን ክኢሉ። ትኬቱ ቅድሚ ዝወድቀሉ መዓልቲ ምኽኣሉ ኣብቲ ቤት ጽሕፈት ከይዱ ስለዘሰረዞ ከኣ ብምሉኡ እቲ ዝኸፈሎ ዋጋ ትኬት ተመሊስሉ። ኣብ መወዳእታ፡ ኩሉ’ቲ ታሪኽ በቲ መንገዲ ኣየር ክፍለጥ ተኻኢሉ። እቲ ዘገርም ግን፡ እቲ ሰብኣይ ኣብ ሕጊ ከቕጽዖ ዝኽእል ዓንቀጽ ስለዘየለ፡ ብመጠንቀቕታ ጥራይ እዩ ተሓሊፉ። ኣፈኛ ናይቲ መንገዲ ኣየር “ንኸምኡ ዓይነት ሳሕቲ ዘጋጥም ነገራት፡ እቲ መንገዲ ኣየር ክቆጻጸሮ ኣይክእልን እዩ” ክትብል ገሊጻ።